بسمة البلعي تكشف حقائق صادمة وتصرخ على المباشر: الله يهلكك يا بن علي.. الله لا يرجعك (فيديو)

مقتطفات من الشهادة الصادمة للسجينة بسمة البلعي احدى ضحايا نظام بن علي:

يحطونا عرايا نساء ورجال في فرقة الأبحاث والتفتيش متاع نابل.. يجيبولك واحد تعرفو وتقدرو وتحترمو يجبوهولك عريان كيما جاباتو أمو ويقولولك تفرج فيه بالسيف عليك!!..

كانوا يتحرشو بي انا واختي الصغيرة.. ويحط يدو علي.. ويبدا يمسح.. ويلمح لحاجات..

وزيد السبان.. والكلام الخايب.. والتهديد باش نعملولك ونعملولك.. والضرب..

بقيت شهرين على هاك الحالة في فرقة نابل.. وشفت كيفاش يعذبو في الرجال.. وكيفاش يهددو في النساء بالاغتصاب باش رجالهم يستعرفو..

وشفت فيصل بركات.. ورشيد الشماخي قبل ما يموتو.. وانا غسلت دمهم من الزاورات الي كانو ملفوفين فيها..

عديت عام حبس.. بعثت جواب لبابا وانا في الحبس بش نطلب منو السماح.. الجواب وصل بعد لا خرجت من الحبس وقت الجنازة متاعو خارجة.. مات بغصتو..

حبيت يكون عندي بيبي.. حبيت نعرس ونعيش كيف البنات الكل.. حبيت نحلم.. لكن كنت ما نحلم كان بمركز الشرطة.. كنت نحلم بالسفساري نلبس فيه باش نمشي نصحح في المركز!!..

وقتاش باش نحلم؟؟!! توة باش نحلم وانا عمري قريب الخمسين؟؟!!..