كتب الناشط ياسين العياري تدوينة كشف فيها كما دوّن معلومات خطيرة و خفايا عن حملة الفساد التي أطلقها رئيس الحكومة يوسف الشاهد
و تحدّث عن الأسباب الحقيقية للحملة و العلاقة المباشرة لكمال اللطيف في ذلك؛ وفيما يلي ما كتبه ياسين العيّاري
موظف سابق في السفارة الأمريكية، عينه رئيس متلقي سيارات مصفحة من الإمارات.. يحاكم شخص بتهمة وضع نفسه تحت ذمة جيش أجنبي في زمن السلم!
لا يحب المنافسة في العمالة هذا الشاهد..
ليست حربا على الفساد، لم توجه أي نوع من تهم الفساد المالي أو البنكي او الصرفي أو في الضرائب أو رشوة.
نحب نقوللكم إني أعرف جدا الفصول 60 و 61 و 62 من المجلة الجزائية.. فقد أحلت بها على القضاء العسكري و أتهمت بتسريب وثائق عسكرية، لا الوثائق الي سربتها معروفة، لا لشكون سربتها معروف، لا من عند شكون خذيتها معروف : لا وجود لها أصلا.. أما برة أكاكة.. قالولهم غرقوه غرقوني و طز في القانون، و نحب نقوللكم زادة أني أعرف جيدا المحاكم العسكرية و ليلى الهمامي و قاضي التحقيق فوزي العياري، فقد حقق في قضيتي و في قضية المرحوم الطاهر العياري.
جماعة خليونا نحلموا ميسالش، و التتبيع لباب الدار و التظاهر ضد الفساد مع بن صالحة و بقية الخروطو : قضي الأمر الذي فيه تستفيان : لا فساد لا زمارة.
شوف.. سأحدثكم عن السياسة في بلدي.. لم تكن يوما افكار و تصورات و أحلام.. سأكتب ما لم اكتبه سابقا.. الكلام سيكون طويلا.. كانك مزروب : واصل طريقك.
كمال اللطيف كان بارون السياسة في تونس، كان مصدر الحكم.. هو الي “دخلوا على بعضهم عرايا” مع بن علي.
هو الي إتدخل لبن علي عبر مقاول شريكه باش روحوا بيه من بولونيا لما كان مغضوب عليه و توسطله باش يرجع في الدولاب
هو صاحب مخطط 7 نوفمبر و الإنقلاب على بورقيبة
حكومات بعد 7 نوفمبر.. ابعاد البكوش.. الكلها تكمبينه
الإنتخابات.. تزويرها.. الميثاق الوطني.. الإنقلاب عليه.. الكلها تكتيكه
بن علي
lui doit tout
السنوات الأولى لبن علي و حتى 91 ، بن علي امني و ما يعرش يعمل السياسة
مكتب كمال اللطيف في نهج بيروت وقتها كان مركز الحكم الفعلي : غادي تتلم السير الذاتية للتعينات و تطبخ الطبخات و الترقيات و الكمامص و تدخل ناس للحبس و تخرج ناس و تتقابل السفراء و المخابرات الأجنبية مع “كوادر الدولة”
في 91 بن علي و كمال اللطيف تعاركو..
زوز أسباب : الأول ، بن علي إكتشف إنه كمال اللطيف عنده وزارة داخلية موازية : بوليسية تعمل في الإكوت و تصور في العباد و توصله مباشرة في المعلومات و طلع كمال عامل ملفات إبتزاز للناس الكل يخدم بيها (كمال كي الهيروين ما فيهش تجراب، مرة وحدة كافية باش تحصل و يسجلك و تصبح ملكه)
الثاني، بن علي عرس بليلى، و كمال ما يساعدوش، خاطر ليلى تحب تعمل السياسة، و تسجل كمال اللطيف يسب فيها و وصلت لبن علي فتقلب عليه و الكلكم تتفكروا هاك التسريبات الصوتية المسجلة الي خرجت توة أربعة سنين لتالي
من 91 اصبح كمال من المغضوب عليهم.. لكن نفوذه مازال : أصبح وكر المعارضة، نجيب الشابي صاحبه، و حمة الهمامي كي دخل للسرية متخبي عنده، نور الدين البحيري صديقه، علاقاته مع السفراء و خاصة مع سفراء أمريكا خلاته عنده مناعة و ما ينجمش بن علي يمسه
هاك الكتاب الي كتبه نيكولاس بو على ليلى.. المعلومات م القصر الي كان ينشر فيها سليم بقة في الأوداس.. الكل مصدرهم كمال
كمال عمل ريزو رهيب: في الحزب، رجال أعمال، معارضة، سفراء، أمنيين، و شرى كمية من الصحافيين : كان يصطاد في ضحايا السيستام الي طحينهم كان غير كافي باش يكونوا من المقربين خاصة مع إستحواذ انساب بن علي على كل شيء.
لما صارت الثورة، الفاكس الي في بيرو كمال كان يوصله المعلومات قبل الغنوشي الوزير الأول
إستغل اللخبطة و حط جماعته في كل مكان : مثلا عبيد و الديماسي في الداخلية، و غيرهم و غيرهم
كان الطرف الوحيد المنظم في البلاد : فلوس، بوليسية، المعارضين الي طلعت الكوطا متاعهم، صحافيين
فتربع كمال على عرش البلاد.. و جاته رجال الأعمال من كل حدب و صوب تبوس في صباطه حتى تفلت من الثورة و المشانق
و تبدلت قايمات الناس المصادرة و تراجعت و وقفت التنفيذات و صار الترافيك الكبير الكل و خدم الأزهر القروي الشابي (وزير العدل) دوسيات فارغة روحت بعدها الناس الكل براءة و قام كمال النابلي في البنك المركزي بما يلزم للي خذاو رضى كمال
الباجي بيده بعد القصبة جابه كمال اللطيف
لزهر العكرمي في الداخلية حطه كمال اللطيف
حكاية فرحات الراجحي بلبزت الأمور شوية.. و كادت تفرعس المعادلة.. لكن وقع قمع الناس الي خرجت في الكياس و تنسية الناس فيها : يملك البوليس و الإعلام و السياسة.
بعد إنتخابات 2011 : كل الفوضى و التكالب و الثلب و ضرب التجربة و صنع النداء و خدمته و تكبيره و البلطجية : ذلك ريزو سي كمال يعمل!
شفيق جراية سارق و فاسد و إمسخ هذا ما يختلفوش فيه اثنين
بعيد الثورة، مشى شفيق طبس راسه لكمال.. انقذني
كمال كان يكون في النقابات الأمنية .. هو يحكم.. اما المصروف؟ يبعثهم لشفيق
كمال يحكم بالجهويات (تفكروا التسريب الصوتي متاعه الي مشكلته مع الخامج الفاسد عبد الله القلال هي إنه صفاقسي) و شفيق ما يفهمش في السياسة.. فكلا على راسه من عند كمال و أبدع كمال في إذلاله
فد شفيق.. و قال يزي! و اعلن الحرب على كمال و حب يولي باترون هو زادة.
بدى شفيق يكون في ريزو
الفرق بين خدمة كمال و خدمة شفيق :
كمال يخدم بمنطق جهوي و ما يعطيش فلوس.. يعطي خدمات : إنت “صاحبه” يحطك سفير، أما كي يبعثلك “صاحبه” لاخر هاك تقضيله و صاحبه لاخر هانو كي نستحقوه نلقاوه : شبكة هو مركزها متغللة في الدولة و الصحافة و المال و الأعمال و القضاء و البوليس و الإدارة و الأحزاب السياسية و مرتبطة بسفارات (الجزائر و أمريكا) : ريزو قايم على الولاءات و الخدمات
شفيق ولد سوق : يصرف! عمل حتى هو ريزو متع صحافيين و قضاة و نواب و سياسيين : ريزو قايم على الفلوس
لكن يشتركوا الزوز في إنه نقطة ضعف هالريزوات الزوز.. هي كمال و شفيق : كلاب كمال و كلاب شفيق غير قادرة تخدم لو يغيب كمال أو شفيق، هوما نقطتها المركزية و إلقائهم في الحبس يجعل الشبكة الكلها ترتبك و تنهار.. هوما بناوها هكاكة باش شبكاتهم ما تكونش اوتونوم و تغلبهم : كل شي لازم يتعدى بيهم
في فترة ماء ريزو شفيق هرى كمال.. عمل فيه الي ما عملوش بن علي
إستغل شفيق عركة كمال و الباجي في الإنتخابات الرئاسية (كمال كان يحب يحط نسيبه النابلي رئيس، بعد ما حطه في البنك المركزي وين صار ترافيك الفساد الكل) باش يبعد على النهضة كي بان إنها بش تخرج من الحكم و يرمي الصحبة على حافظ و الباجي شخصيا.. و يصرف
توافق النهضة و النداء أسعد شفيق : فلوسه الكل فرد بلاصة
أمام تعاظم نفوذه.. كمال عمل معاه صلح و مفاهمة نشد كلابي و تشد كلابك… و الزوز يعرفوا إنها فقط هدنة.. الأمور هاذي كي
highlander : il ne peut en rester qu’un
شفيق زاد كبر راسه.. و حب يفك الحكم و ينهي الطرح.. حب يكون كمال اللطيف الجديد.. شاف البهيم الي بش يركب عليه : حافظ
ريتو الي استقالوا من النداء و عملو فوفعة : رضا بالحاج، لزهر العكرمي …: كلاب كمال، الي فكولهم كلاب شفيق الطرح
هنا كمال معادش يساعده..اللعب ولا بعشانا و حافظ فك النداء.
بدا يحفر لحافظ بالشاهد.. و بدات حرب التسريبات : تلك وسيلة كمال و بصمته.
صارت الفرقة بين حافظ و الشاهد بخدمة صحيحة من كلب كمال الوفي بن نتيشة
صور كمال للشاهد إنه مصلحتهم وحدة و الي حافظ و شفيق يلعبوله ( هوما كانوا يلعبوله و الشاهد كان بش يتنحى بعد رمضان)
تحالف كمال مع الشاهد في :
un pacte des loups
ذيب هرم له الخبرة، و ذيب صغير له العضلات
للقضاء على جراية.. مع تعهد كمال للشاهد انه سيصنعه كيما صنع بن علي و أنه رئيس تونس المقبل لعقود ( و هو قادر : شوفوا قدرة ريزو كمال، في عامين صنع النداء، و في نهارين خرج الشاهد زعيم تهب له الطحانة من كل صوب).
الحكاية إذا.. لا فساد لا زمارة.. هذه هي الحكاية ، كل الحكاية.. لا أكثر
الي يصفق للشاهد.. هو كمن يرقص في طهور ولد كمال (و هذه غمزة.. ففي سنوات مضت كان طهور ولد كمال أهم حدث سياسي في البلاد تقلبت بيه سياسات و تموقعات)
الصورة أمامكم و إختصرتها جدا : الشاهد ماريونات، ما عنده لا الرغبة و لا القدرة و لا الإمكانية لمحاربة الفساد.. ريق فارغ : كمال يستعمل فيه و في الدولة ليجعل من شفيق عبرة لكل من تسول له نفسه المس من الإمبراطور (تفكروا كي عفس بوليس بكرهبته مواقف الأحزاب و النقابات و القضاة و البوليسية و الأدمينات و الصحافة لتعلموا قوة الريزو متاعه)
إتفاق باريس بين الباجي و الغنوشي صار لما فهم الغنوشي أن كمال أقوى منه.
أعرف كمال جيدا.. قرأت كل ما كتب عنه، و حب يدخلني في الريزو متاعه و عرض عليا نكون كاتب دولة و فلوس و برنامج في التلفزة و هذا الكل قلته بالأسماء و الوقائع و الأدلة في التحقيق، و إنتقم مني إنتقاما لما قلته : تشويه و تسفيه و حرمان من الإعلام و مشاكل قضائية و تبعني حتى هنا في فرانسا ..
شوف،
أنا مع محاكمة شفيق جراية و المزابي و المدب و العتروس و الكل!
مع المصادقة على قانون “من أين لك هذا” الراقد في الرفوف
مع سحب قانون تبييض الخماج و مانيش مسامح ملي كنت منعوت بالصبع عنيف و ثورجي و متابع قضائيا ظلما وقت بعض الناس الي موش مسامحة تو ، البارح تضرب في البوقا سيدر و الروز بالفاكية من عند الناس الي معادش مسامحينهم.
لكن عفوا : عندما يأخذ كمال كل الدولة رهينة مرة اخرى.. و الجماعة بين طحان و فرحان : هذا هو كل الفساد : دولة في خدمة لوبيات و الطبالة اتطبل.
ساقي في شفيق و في كمال : الإنتقال الديمقراطي يحول لسبعة نوفمبر جديدة، بأيادي كمال مرة أخرى! هذا مرفوض مرفوض مرفوض.
متعود على المعارك الخاسرة و السباحة ضد التيار و لو سبّحتم كلكم بإسم الشاهد حصان كمال الجديد، سأحاربه بما عندي : جرد صفحة فايسبوك.
أنستكم بمحاربة الفساد بالقضاء العسكري و بالموظف السابق بسفارة أمريكا الي نسيبه أكبر فاسد في تونس صلاح قايد السبسي : بليس ينهى على المنكر و كان جاء فالح راو م البارح و كان جا بوزيد يعمر راهو عمر سواني بلاده و من نفقته (بن صالحة و العماري) باين عشاه
و كيما يقول الفرنساوي :
les mouches ne font pas du miel!
هذه الكلمات سيكون ثمنها باهضا، أعلم ذلك : سأدفعه راضيا قابلا مهما غلا.. ككل مرة
رمضانكم مبروك
إرسال تعليق